Цымбалы, гітара, кахон, джэмбе, там-там, бубны, трохкутнік, шархуны, варганы, казу, акарыны самых розных памераў і дыяпазонаў, манджыра, флейта дажджу, Spring Dram і ўся прастора вакол, якая здольная выдаваць гукі – вось няпоўны інструментальны свет PANI malalа – гурта сучаснай этна-фолк музыкі.

Як народныя песні набываюць рысы рэгі, сумяшчаюць у сабе кампазіцыі класікаў, ўзбагачаюцца джазавымі інтанацыямі і сучаснымі рытмамі? Аповед кожнага твора натхняе удзельнікаў гурта шукаць сродкі выразнасці, здольныя данесці сучаснікам закладзены ў песнях сюжэт. Музыка і тэатр у роўнай ступені спалучаюцца ў творчасці PANI malalа.

Тры выканаўцы злучаюць арыгінальныя існуючыя і знойдзеныя прыёмы ігры і вакал у адначассі…

• Кацярына Макарчук – музыкант, студэнтка Беларускай дзяржаўнай акадэміі музыкі, выкладчык вакалу ў самых маленькіх талентаў, лёгкасць і настрой гурта;

• Юліана Шырма – музыкант, рэжысёр, аспірантка Беларускай дзяржаўнай акадэміі мастацтваў, педагог-пастаноўшчык Нацыянальнай школы прыгажосці, натхненне, крэатыў і стымул калектыву;

• Філіп Сычоў – музыкант, вакаліст, праграміст і майстар любой справы, якой захапляецца, апора і надзейнасць гурта.

Калектыў PANI malalа творыць гісторыямі славянскіх народных песень, якія становяцца вялікай п’есай кожнай новай сустрэчы з глядачом…